धुलिखेल, १७ बैशाखः काभ्रे उपत्यका एकीकृत खानेपानी आयोजना अन्तिम चरणमा पुगेसँगै पूर्वमन्त्री गोकुल बास्कोटाले अब आफ्नो ध्यान पाँचखाल तिर पुगेको बताएका छन् । सामाजिक सञ्जाल फेसबुक मार्फत पूर्व मन्त्री बास्कोटाले बनेपा, धुलिखेल र पनौतीका नागरिकलाई बधाई दिदैँ पाँचखालको विद्यमान खानेपानी समस्या समाधानमा लाग्ने बताएका हुन् ।

काभ्रे उपत्यका एकिकृत खानेपानीको मुहान देखि मुख्य ट्याङ्कीसम्म पानी परिक्षण कार्य सफल भएको बताइएको छ । यस खानेपानी आयोजनाको काम लकडाउनको अवधीमा पनि सूचारु गर्ने निर्णय भएको छ । पाँचखालका नागरिक पनि खानेपानीको चरम अभाव झेलिरहेका छन् । मन्त्री बास्कोटाले पाँचखालमा बृहत खानेपानी आयोजना सञ्चालनका लागि ध्यान केन्द्रित गर्ने बताएका हुन् ।

नेपाल सरकार, एसियाली विकास बैंक र बनेपा–धुलिखेल–पनौती नगरपालिकाहरूको संयुक्त लगानीमा काभ्रे उपत्यका एकीकृत खानेपानी आयोजना सन् २०१३ को जुन १२ देखि सञ्चालनमा आएको थियो । यो आयोजनाबाट तीनवटै नगरपालिकाका झण्डै ७५ हजार नागरिक लाभान्वित हुनेछन् ।