धुलिखेल, १५ बैशाखः जिल्लामा गठन भएको कमाण्ड पोष्टका पदाधिकारीले लकडाउनको अवस्था अनुगमन गरेका छन् । सोमबार उनीहरुले धुलिखेलदेखि काभ्रे र भक्तपुरको सिमाना साँगाभञ्ज्याङ् सम्म अनुगमन गरेका हुन् ।

प्रमुख जिल्ला अधिकारी श्रवण कुमार तिमिल्सिना संयोजक रहेको कमाण्ड पोष्टका पदाधिकारी साँगासम्म पुगेका थिए । कमाण्ड पोष्टका पदाधिकारी सवार गाडी साँगामा रोकियो । काभ्रेका प्रहरीले प्रमुख एसपी रविकुमार पौडेलले आफु मातहतका कर्मचारीलाई केहि निर्देशन दिए । एक्कैछिन काभ्रे प्रवेश गर्न लागेका केहि सवारी साधन त्यहि रहेका प्रहरीले चेकजाँच गरे ।

गृह मन्त्रालयका पत्र पाएपछि अनुगमन गर्न पुगेको कमाण्ड पोष्टका पदाधिकारी सवार गाडी फर्किने वित्तिकै पछिपछि अन्य गाडीहरु लस्कर देखिन्थ्यो । पछिल्लो समय स्थानीय तहले रातरात आफ्ना नागरिक लैजान थालेदेखिनै लकडाउन काभ्रे जिल्लामा निकै खुकुलो भएको आभाष भएको थियो ।

दुई राष्ट्रिय राजमार्ग पनि काभ्रे जिल्लामै पर्ने भएर होला लकडाउनको कुनै अनुभूति नागरिकले गरेका छैनन । हुन त यो प्रशासनको लागि भन्दा पनि स्वयम आफ्नै लागि भनेर नागरिकले बुझ्नुपर्ने हो । तर नबुझ्नेलाई बुझाउने काम प्रशासनको हो । लकडाउन भएको ३५ औँ दिन बित्दा पनि लकडाउनको पूर्ण पालना भएको एकदिन पनि छैन ।

बिना पासका सवारी साधन ग्वारग्वार्ती कुदिरहेका छन् । त्यो नियन्त्रण गर्न तर्फ प्रशासन लगभग चुकेको देखिन्छ । पसल खोल्ने र बन्द गर्ने समय निर्धाण गरिएको छ । तर नियम पालना नगर्नेलाई अहिलेसम्म कुनै कारबाही भएको छैन । हुन त काभ्रे जिल्लामा अहिलेसम्म कुनै संक्रमित ब्यक्ति भेटिएका छैनन् । नभेटिउन पनि । तर लकडाउनको औचित्य नै नहुने गरी भइरहेका गतिविधिले संक्रमण नभित्रिएला भन्न सकिन्न । कमाण्ड पोष्टले अनुगमन गर्ने र सुरक्षामा खटिएका प्रहरीहरुको आत्मबल बढाउन काम गर्न जरुरी छ ।