धुलिखेल, १४ बैशाखः रोशी गाउँपालिका अध्यक्ष डिबी लामा आफैले बनाएको नियम तोडेका छन् । उनले बैशाख २ गते पालिकाभित्र राहत वितरण गर्न आउनेका लागि उर्दी जारी गरे । तर उनैले पालना गरेनन् ।

पालिका अध्यक्ष लामा आफैले हस्ताक्षर गरेको २ बैशाखको उक्त सूचनाको बुदाँ नम्बर ६ मा प्रष्टसँग लेखिएको छ । ‘राहत वितरण गर्दा फोटोहरु नखिच्ने र ३ जना भन्दा बढी भेला नहुने ।’ तर उनै पालिका अध्यक्ष लामाले उक्त निमयको ठाडो उल्लंघन गर्दै राहत थापेको फोटो आफ्नो फेसबुक पेजमा ‘सियर’ गरेका छन् ।

उनले भने अनुसार ३ जनाभन्दा बढी भेला हुन नपाउने हो । तर प्रारम्भ र आनी छोईङ् डोल्मा फÞाउण्डेशनले वितरण गरेको उक्त राहत थापेको फोटोमा ५ जना छन् । सामग्री हस्तान्तरण गर्दै गरेको फोटोमा पालिका अध्यक्ष डिबी लामा, गायिका आनी छोईङ् डोल्मा, सिंगापुर रेडक्रसकी नेपाल प्रतिनिधि कल्पना क्षेत्री, प्रेस काउन्सिलका सदस्य इश्वरी ओझा र पत्रकार महासंघ काभ्रे शाखाका सल्लाहकार बद्री तिमिल्सिना छन् ।

प्रारम्भ र आनी छोईङ् डोल्मा फाउण्डेशनले रोशी गाउँपालिका अध्यक्ष लामालाई १५ थान पर्सनल प्रोटेक्टिब इक्यूपमेन्ट (पीपीइ), २० थान एन ९५ मास्क र २४ थान फस्र्ट एड किट्स हस्तारण गरेको थियो ।

लकडाउन पछि पैदल हिडेका यात्रुहरुको उद्धार गरेको भन्दै जिल्लाका केहि सञ्चार माध्यममा छाएका पालिका अध्यक्ष डिबी लामाले बेला बेला सस्तो लोकप्रियता कमाउन यस्तै निर्णय गर्ने गरेका छन् । यसअघि सवारी पास समेत नलिएको गाडी मार्फत अध्यक्ष लामाले मान्छे ओसारेका थिए ।

यातायातको साधन नचलेपछि बीपी राजमार्गबाट गाउँ जानेको लस्कर बढेको थियो । रोशी गाउँपालिका अध्यक्षले गरेको यस किसिमका गतिविधि प्रति प्रमुख जिल्ला अधिकारी श्रवण कुमार तिमिल्सिनाले नै त्यस्तो गतिविधि रोक्न निर्देशन दिएका थिए ।

हेर्नुस पालिका प्रमुखले निकालेकाे सुचना