धुलिखेल, ७ बैशाखः तेमाल गाउँपालिका वडा नम्बर २ चुखामा काक्रो बिक्रीबाट मात्रै बार्षिक १ करोड रुपैयाँ भित्र्ने गरेको छ । बैशाख र जेठ दुई महिना काक्रोको सिजन हो । चुखाका अधिकांश किसानको बारीमा काक्रो टिप्ने बेला भएको छ ।

एक जना किसानले ५ लाख रुपैयाँसम्मको काक्रो बेच्ने गरेको वडाध्यक्ष तिमाल सिं तामाङले बताउनुभयो । वडाध्यक्ष तामाङका अनुसार किसानहरुले जग्गा भाडामा लिएर समेत काक्रो खेती गरिरहेका छन् । चुखा क्षेत्रमा मात्रै ४ सय किसानले काक्रो खेती गरिरहेका छन् ।

यो वर्ष ८ रोपनी जग्गामा काक्रो लगाएका किसान बिरनन्द तामाङले राम्रो भाउ पाए ५ लाखभन्दा बढी आम्दानी लिने बताए । ‘काक्रोको प्रति केजी ४०/५० रुपैयाँ भाउ पाइयो भने ५ लाख कट्छ बिरनन्दले भने ‘राजमा र चौमासे सिमी ले पनि लगाएको छु ।’

चुखामा जनप्रनितिधि देखि शिक्षकसम्म खेतीमा होमिएका छन् । राम्रो आम्दानी गरिरहेका छन् । आर्थिक अवस्था सुधार हुदैँ गएपछि झैझगडा पनि नहुदाँ रहेछ, वडाध्यक्ष तामाङले भने ।’

चुखाका किसानले काक्रो पछि लगाएको दोस्रो महत्वपूर्ण नगदे बाली हो राजमा । त्यसपछि चौमासे सिमी, गोलभेडा, खुर्सानी, बकुला, साग, बोडी, धनियाँ जस्ता नगदेबालीबाट किसानले आम्दानी गरिरहेका छन् ।

खेतीमा लागि रहेका किसानले पानीको भने समस्या औल्याएका छन् । ‘खेती गर्ने किसानको संख्या बढ्दो छ, त्यहि अनुसार खेतीको गर्ने जग्गाको क्षेत्रफल पनि बडिनै रहेको छ, किसान बिरनन्दले भने ‘पानीको मात्रा बढाउन सकियो भने आम्दानी अझ बढि लिन सकिन्थ्यो ।’