धुलिखेल, ५ बैशाखः तेमाल गाउँपालिकाले आफ्नो क्षेत्रभित्र प्रवेश गर्ने सबै नाकामा ढाँट राखेको छ । शुक्रबार पालिका प्रमुख समाल सिं तामाङ आफै पुगेर बोहोर दोभान, खहरेघाट, पचुवारघाट लगायतका स्थानमा ढाँट राख्न पुगेका थिए ।

पालिकाले बिहिबार एक सुचना निकालेर तेमालभित्र प्रवेश गर्ने १० वटा नाका सिल गर्ने निर्णय गरेको थियो । पालिकाले सबै नाकामा स्वयमसेवक राख्ने तयारी समेत गरेको छ । पालिकाभित्र प्रवेश गर्ने बोहोरदोभान, खहरेघाट, पचुवारघाट, तित्रीटार, माम्तीबेंशी पुल बजार, बोज्र्याङबेंशी, काल्धरबेंशी, थिल्वारवेंशी, गिम्दी बेंशी र कालिमाटी प्रवेशद्वार नाका पूर्ण रुपमा बन्दको घोषणा गरेको थियो ।

नाका बन्द गर्न वडाका जनप्रनितिनिधि समेत पुगेका थिए । पालिकाले विहान ६ बजेदेखि ९ बजेसम्म र दिउँसो ३ बजेदेखि साँझ ६ बजेसमम्म मात्रै खाद्य सामग्री बिक्री वितरण गर्ने पसल खुल्न निर्देशन दिएको छ । पालिका अध्यक्ष तामाङले विशेष सूचना मार्फत पालिकाभित्र धार्मिक तथा पर्यटकीय स्थलहरुमा पूजापाठ लगायतका कार्य पनि पूर्ण रुपमा बन्द गर्न आह्वान गरेका थिए ।