धुलिखेल, १ बैशाख, काभ्रेमा सोमबार दोस्रो दिन पनि र्यापिड डाइग्नोष्टिक टेष्ट मार्फत विदेशबाट आएहरुको कोरोना भाइरस परिक्षण गरिएको छ । हिजोबाट जिल्लाका विभिन्न स्थानीय तहहरुले परिक्षण थालेका थिए । धुलिखेल नगरपालिकाले हिजो र आज गरी १८ जनाको परिक्षण सकाएको स्वास्थ्य शाखा संयोजक सन्दिप केसीले जानकारी दिए ।

त्यस्तै पाँचखाल नगरपालिकाले नगरपालिका भित्रका २७ जनाको कोरोना भाइरसको परिक्षण गरिएको छ । स्वास्थ्य कार्यालयको तथ्याङ्क अनुसार चैत १ गतेदेखि यता जिल्लामा २७१ जना विभिन्न देशबाट फर्किएका नागरिक सम्पर्कमा आएका छन् । उनीहरुको सबैको परिक्षण हुनेछ ।

बागमती प्रदेश सरकारको सामाजिक विकास मन्त्रालयले काभ्रे जिल्लालाई र्यापिड डाइग्नोष्टिक टेष्ट का लागि ३ सय थान किट पठाएको थियो ।