धुलिखेल, १ बैशाखः सिन्धुपाल्चोक जिल्लाको जुगल गाउँपालिकाले जमघट सहित विवाह गरे कारबाही गर्ने चेतावनी दिएको छ । बैशाख महिना शुरुसँगै विवाहको लगन समेत सुरु भएको र जमघट सहित विवाहको सुचना प्राप्त गरेको भन्दै पालिकाले त्यसो नगर्न उर्दी जारी गरेको हो ।

पालिका प्रमुख प्रशासकीय अधिकृत लोक बहादुर वि.कले जारी गरेको सुचनामा कोरोना भाइरसको संक्रमण नफैलियोस् भन्नका लागि सामाजिक दुरी कायम गर्नुपर्ने भएकाले भिडभाड हुने गरी विवाह नगर्न उर्दी जारी गरेका हुन् । विवाह नगरी नहुने अवस्थामा वडा कार्यालयसँग समन्वय गरी स्थानीय पञ्जिकाधिकारीको रोहवरमा नियमानुसार वर बधुलाई विवाह सम्पन्नको प्रमाणपत्र प्रदान गरिने प्रमुख प्रशासकीय अधिकृत वि.कले बताए ।

पालिकाले मानिसहरुको धेरै भिडभाड हुने गरी ब्रतबन्ध, छेवार, मेला, पर्व जस्ता सामाजिक तथा धार्मिक कार्य नगर्न समेत उर्दी जारी गरेको छ । यदि पालिकाको आग्रह विपरित कसैले यस्तो कार्य गरे कानुन बमोजिम कार्बाहि गरिने प्रमुख प्रशासकीय अधिकृत विकले बताए ।