धुलिखेल २८ चैत काभ्रेको अति विकट डाँडापारी क्षेत्रमा पर्ने महाभारत गाउँपालिकाले पसल खोल्ने समय निर्धारण गरेको छ । शुक्रबार बसेको कार्यपालिका बैठकले यस्तो निर्णय गरेको हो । कार्यपालिका बैठकले अत्यावश्क काम बाहेक एक वडाबाट अर्को वडामा जान नपाउने निर्णय समेत गरेको छ ।

बैठकको निर्णय अनुसार पालिकाभित्रका सबै किमिसका पसलहरु विहान ८ बजेदेखि १० बजेसम्म र दिसँसो ३ बजेखि ५ बजेसम्म मात्रै खुल्न पाउने छन् । त्यस्तै पालिकाभित्रका पसलहरुको नियमित अनुगमन गर्न उपप्रमुखको संयोजकत्वमा रहेको बजार अनुगमन समितिलाई थप प्रभावकारी बनाइएको छ । बैठकले पालिकाभित्र ५ जना भन्दा बढी संख्यामा जमघट गर्न नदिने निर्णय गरेको छ ।

बैठकले पालिकाभित्र कोहि विदेशबाट भित्रिए तत्काल खबर गर्न पनि सबैसँग आग्रह गरेको छ । त्यस्तै खाद्य संकट हुन नदिन आपूर्ति ब्यवस्थालाई सहज बनाउने निर्णय भएको प्रवक्ता मोक्तानले जानकारी दिए ।

पालिकाभित्र रहेका गरिब, दैनिक ज्याला मजुरी गर्ने र विपन्न घरपरिवारलाई राहत उपलब्ध गराउन फूड बैंक स्थापना गर्ने पनि बैठकले निर्णय गरेको छ । अब दाताहरुले फूड बैंकमा राहत उपलब्ध गराउनुपर्नेछ । जथाभावी राहत वितरण गर्न नदिन जनप्रतिनिधिहरुले आ–आफ्नो क्षेत्रमा निगरानी बढाउने भएका छन् ।

पालिकाले यसअघि २५ लाखको कोरोना विशेष कोष स्थापना गरिसकेको छ ।