धुलिखेल, २५ चैतः आफ्नो नगरबासीलाई कोरोना भाइरस संक्रमणबाट जोगाउन अनेक तरिकाको खोजीमा रहेका पाँचखाल नगरपालिकाका मेयर महेश खरेलले पसल खोल्ने समय तोकेका छन् । मंगलबार नगरपालिकामा बसेको संयुक्त बैठकमा मार्फत खरेलले नगरपालिकाभित्रका पसल निश्चित समयभित्र मात्रै खोल्न पाउने निर्णय गराएका हुन् ।

बैठकको निर्णय अनुसार खाद्यान्न, तकारी, मासु तथा फलफूल पसल हप्ताको दुई दिन विहान ६ बजेदेखि १० सम्म मात्रै खोल्न पाइने छ । यो सयममा हप्ताको सोमबार र शुक्रबारमात्रै खोल्न पाइनेछ । यो नियम औषधि, भेटेरिनरी तथा बिउ विजन बेचविखन गर्ने पसललाई लागु हुने छैन । मेयर खरेलले यो बाध्यात्मक निर्णय भएको भन्दै ब्यवहारमा लागु गर्न नगरबासीलाई आह्वान गरेका छन् ।

रक्सी, गुट्खा तथा सुपारी जन्य बस्तु अर्को सुचना जारी नभएसमम्मका लागि बिक्री वितरण गर्न पुर्ण प्रतिबन्ध लगाउने निर्णय गरेको मेयर खरेलले जानकारी दिए । बैठकमा पाँचखाल नगरपालिकालाइृ ३ महिनाका लागि खाद्य संकन नहुन नदिन ब्यवसायीहरुले सामुहिक प्रतिबद्धता समेत जनाएका छन् । ‘हिजो मैले जसरी पाँचखालबासीको घर–घर पुगेर मत मागेरको थिए, आज उहाँकै जीवन रक्षाका लागि यो कठोर निर्णय गरेको छु, मेयर खरेलले भने ‘यसलाई पूर्ण पालना गरिदिनोस् कोरोना भाइरसबाट हाम्रो नगरका कोहि पनि नागरिक संक्रमित नहुन ।’

नगरपालिका गरेको निर्णय नमाने प्रचलित कानुन बमोजिम कारबाही गरिने पनि बैठकले निर्णय गरेको छ ।