धुलिखेल, २४ चैतः काभ्रेको अति विकट क्षेत्रमा पर्ने महाभारत गाउँपालिकामा ३५ बेडको क्वारेन्टाइन तयार भएको छ । गाउँपालिकाले कोरोना भाईरस(कोभिड–१९ ) रोकथामका लागि उच्च जोखिम र शंस्कास्पद व्यक्तिहरुलाई सुरक्षित राख्न ३५ बेड क्षमताको क्वारेन्टाइन तयार परेको पालिका अध्यक्ष कान्छामान जिम्बाले जानकारी दिए ।

पालिकाले महासिद्धि प्राथमिक विद्यालयको भवनमा, ८ बेड र वडा नम्बर ५ को वडा कार्यालयमा ६ बेड, गाउँपालिकाको पुरानोे भबनमा ७ बेड, घर्तिछाप स्वास्थ्य चौकीमा ४ बेड, भैरव माध्यामिक विद्यालयको भवन धापमा ६ बेड र बाल उज्जाल प्राथमिक विद्यालय ४ बेड गरि ३५ बेडका तयार पारेको पालिका अध्यक्ष जिम्बाले बताए ।

क्वारेन्टाईनमा स्वास्थ्यकर्मी, खाना, स्वास्थ्य जाच, सुरक्षा, व्यक्तीगत सरसफाइको किटबक्स लगायत अत्यावश्क सबै सामान पुगिसकेको अध्यक्ष जिम्बाले बताए । ‘हाम्रो विकट ठाउँ भएपनि हामीले यहिको स्रोत साधनलाई अधिकतम प्रयोग गरेर ३५ बेडको क्वारेन्टाइन तयारी अवस्थामा राखेका छौँ, पालिकाध्यक्ष जिम्बाले भने ‘कोरोनाभाइरसका संक्रमण नफैलियोस भन्नका लागि पालिकाभित्र प्रवेश गर्ने सबै नाकाहरुमा पनि कडाइ गरिएको छ ।’