धुलिखेल, २३ चैतः पनौती नगरपालिका वडा नम्बर ८ का वडा सदस्य शोभा कार्की फूड बैंकमा खाद्यन्न सहयोग गरेकी छन् । नगरपालिकाले कोरोना भाइरसको संक्रमणपछि राहत ब्यवस्थापनका लागि सञ्चालनमा ल्याएको फूड बैंकमा कार्कीले आइतबार सहयोग गरेकी हुन् ।

कार्कीले ५० बोरा चालम, २० बोरा चिउरा र ४ बोरा नुन सहयोग गरेको फूड बैंक ब्यवस्थापन समितिका संयोजक इन्द्रप्रसाद अधिकारीले जानकारी दिए । अधिकारीका अनुसार वडा सदस्य कार्कीले गरेको सहयोग हालसम्मकै धेरै हो ।

आइतबार नै बिन्धवासिनी बचत तथा ऋण सहकारी संस्थाले २० चालम र २ बोरा चिनी, धनध्वज तामाङले ५ बोरा दाल, विवेक विक्रम राणाले ५ बोरा आलु उपलब्ध गराएको बरिष्ठ प्रशासकीय अधिकृत समेत रहनुभएका फूड बैंक ब्यवस्थापन समितिका संयोजक अधिकारीले बताए ।

दिउँसोसम्म १६ जना ब्यक्ति तथा संघसंस्थाले फूड बैंकमा सहयोग गरेका छन् । पालिकाले बिहीबारदेखि फूड बैंक सञ्चालनमा ल्याएको हो । नगरपालिकाले दैनिक ज्याला मजदुरी गर्ने र अति विपन्न १३० घरधुरी परिवारलाई पहिलो चरणको राहत उपलब्ध गराइसकेको नगरप्रमुख भिमप्रसाद न्यौपानेले बताए । पालिकाले राहत वितरणको मापदण्ड समेत तयार गरेको छ । राहत प्याकेजमा १७ प्रकारका दैनिक उपभोग्य चिज उपलब्ध गराइएको नगरप्रमुख न्यौपानेले बताए ।