धुलिखेल, २१ चैतः पनौति नगरपालिकाले सञ्चालनमा ल्याएको फूड बैंकमा सहयोग आउने क्रम बढेको छ । शुक्रबार बागमति टिपर ब्यवसायी संघले ३४ बोरो चालम सहयोग गरेको नगरपालिकाका वरिष्ठ प्रशासकीय अधिकृत इन्द्रप्रसाद अधिकारीले जानकारी दिए ।

त्यस्तै आत्मा ज्ञान प्रचारक संघ काभ्रेले वडा नम्बर ६ मा बाड्ने गरी ३० घरपरिवारलाई पहिलो नम्बरको राहत प्याकेज (४ जना भन्दा कम परिवार संख्या) उपलब्ध गराएको छ । यसैबीच नगरपालिकाले अतिविपन्न १३० घर परिवारका लागि भोली राहत वितरण गर्ने भएको छ । नगरपालिका आफैले खरिद गरेर राहत वितरण गर्न लागेको हो ।

वडा नम्बर ७ मा २० र बाँकी रहेका वडामा १०÷१० वटा राहत प्याकेज उपलब्ध गराइने फूड बैंक ब्यवस्थापन समितिका संयोजक समेत रहनुभएका वरिष्ठ प्रशासकीय अधिकृत अधिकारीले बताए । नगरपालिकाभित्र १२ वटा वडा रहेका छन् ।

नगरपालिकाको विपद् ब्यवस्थापन समितिको बैठकले १७ प्रकारको खाद्यान्न राहत प्याकेजमा समावेश गरेर वितरण गर्ने निर्णय गरेको थियो । सोहि अनुसार नगरपालिकाले राहत खरिद गरिसकेको र शनिबारबाट सबै वडामा पुर्याउन सबै तयारी सकिएको वरिष्ठ प्रशासकीय अधिकृत अधिकारीले बताए ।