धुलिखेल, २० चैतः काभ्रेको महाभारत गाउँपालिका वडा नम्बर ५ का वडाध्यक्ष रविन मोक्तानले आफ्नै कार्यालय भवनमा क्वारेन्टाइन बनाएका छन् । चार किल्लामा निर्माण भएको वडा कार्यालयको नयाँ भवनमा अध्यक्ष मोक्तानले कोरोना भाइरसको जोखिम भएका ब्यक्ति राख्न ६ वेडको क्वारेन्टाइन बनाएका हुन् ।

वडाध्यक्ष मोक्तानले स्थानीय तहमै काठको बेड बनाएर क्वारेन्टाइन तयार पारेका छन् । ‘यो विपद्को समयमा भवन खालि राख्नु भन्दा आम जनताको सेवाका लागि उपयोग गर्न दिँदा राम्रो हुन्छ, यस्तो बेला हामीले जहाँबाट जे सक्छाै त्यहि सहयोग गर्ने हो, वडाध्यक्ष मोक्तानले भने ‘अहिले हामी पुरानै भवनबाटै काम चलाई रहेका छौँ ।’

पालिकाले वडा नम्बर ४ मा रहेको महासिद्धी प्राथमिक विद्यालयको भवनमा समेत ८ वेडको क्वारेन्टाइन तयार पारिसकेकाे छ । पालिकाभर १७ वेडको क्वारेन्टाइन बनाइने गाउँपालिका अध्यक्ष कान्छालाल जिम्बाले बताए । उनका अनुसार पालिकाभित्र एक महिनाको बिचमा विदेशबाट आएका मध्ये १५ जना पालिकाको सम्पर्कमा रहेका छन् ।