धुलिखेल, १५ चैतः उद्योग वाणिज्य संघ काभ्रेले विपद् ब्यवस्थापन समितिलाई खाद्यान्न सहयोग हस्तान्तरण गरेको छ । १२ बोरा चामल, दुई बोरा चिउरा, एक बोरा रातो दाल, दुई बोरा मस्याउरा, एक बोरा नुन र दुई बाक्सा खाने तेल हस्तान्तरण गरेको संघका अध्यक्ष प्रकाश मानन्धरले जानकारी दिए ।

संघले काभ्रेका प्रमुख जिल्ला अधिकारी एवं कोरोनाभाइरस कमाण्ड फोर्सका संयोजक श्रवण कुमार तिमिल्सिनालाई खाद्यान्न हस्तान्तरण गरेको हो । त्यस्तै संघले विभिन्न संघसंस्थासँगको सहकार्यमा ५० वटा क्वारेन्टाइन वेडलाई आवश्यक पर्ने सामग्री पनि हस्तान्तण गरेको अध्यक्ष मानन्धरले बताए ।

जिल्ला विपद् ब्यवस्थापन समितिले वाणिज्य संघलाई एक सय वेड क्वारेन्टाइनका सामग्री ब्यवस्था गर्न भनेको थियो । संघका अध्यक्ष मानन्धरले तत्काललाई ५० वेडका लागि सहयोग उपलब्ध गराएको र बाँकी पनि गर्दै जाने बताए ।