धुलिखेल, २६ फागुनः जिल्ला परीक्षा समन्वय समिति काभ्रेले यो वर्ष हुने माध्यमिक शिक्षा परीक्षा एसइई को तयारी तीब्र पारेको छ । एसईई परीक्षामा यो वर्षको काभ्रे जिल्लाबाट नियमित तर्फ ७ हजार दुई सय चालिस जना विद्यार्थी सहभागि हुदैँ छन् ।

आंशिकतर्फ भने जम्मा ३५ जना मात्रै विद्यार्थी रहेको शिक्षा बिकास तथा समन्वय ईकाई काभ्रेका प्रमुख गोकर्ण ध्वज कार्कीले जानकारी दिए । नियमित र आंशिकका गरी सात हजार दुई सय ७५ विद्यार्थीका लागि ४० वटा परीक्षा केन्द्र तोकिएको छ ।

परीक्षालाई मर्यादित र व्यवस्थित बनाउन जिल्ला परीक्षा समन्वय समिति मार्फत सबै तयारी भईरहेको समन्वय ईकाईका प्रमुख कार्कीले बताए । ‘एसइइ परीक्षाको तयारी निकै तीब्र पारेका छौँ, कार्कीले भने ‘सुरक्षा, प्रश्नपत्र, केन्द्राध्यक्ष छनौट समयमै हुन्छ ।’ यो वर्षको एसइई परीक्षा चैत्र ६ गते देखि सुरु हुदैँछ ।