धुलिखेल, १२ फागुनः काभ्रेको पाँचखाल नगरपलिका वडा नम्बर ८ गर्भवती-सुत्केरी महिलालाई अण्डा र घ्यू उपहार दिन थालेको छ । वडाले मातुशिशु पोषण कार्यक्रम अन्तर्गत अण्डा र घ्यू उपहार दिन सुरु गरिएको वडाध्यक्ष सञ्जय तामाङले जानकारी दिए ।

मातृशिशु पोषण सुरक्षाको लागि हरेक गर्भवती महिलालाई एक क्रेट अन्डा र आधा किलो घ्यू उपहार दिन थालेको पालिकाका प्रवक्ता समेत रहेका वडाध्यक्ष तामाङले बताए । ‘यो एउटा सानो अभियान हो, जसले गर्भवती र सुत्केरी भइसकेका महिलाको पोषणमा केहि मद्दत गर्छ भन्ने लागेको छ, वडाध्यक्ष तामाङले भने ‘हामी यसलाई निरन्तरता दिन्छाैँ ।’

वडाले आइतबारबाट अण्डा र घ्यू उपहार दिन थालेको हो । गर्भवती र सुत्केरी १४ जना महिलालाई प्रदान गरेको छ । गर्भवती भएपछि स्वास्थ्य संस्थामा जाँच गराउन आउन थाले देखी सुनौलो हजार दिनसम्मका महिलालाई वडाले अन्डा र घिउ उपहार दिने ब्यवस्था मिलाएको छ ।