धुलिखेल, २९ माघः जिल्ला विपद् ब्यवस्थापन समिति सिन्धुपाल्चोकले जुगल गाउँपालिकाको वडा नम्बर ३ गुम्बामा देखिएको लक्षण कोरोनाभाइरस नभएको भन्दै नआत्ति आग्रह गरेको छ । प्रमुख जिल्ला अधिकारी एवं जिल्ला विपद् ब्यवस्थापन समितिका अध्यक्ष उमेश कुमार ढकालले बुधबार (आज) एक प्रेस विज्ञाप्ति निकालेर यस्तो बताएका हुन् । विज्ञप्तिमा गाउँपालिकाको पत्रको हवाला दिएर सञ्चार माध्यमहरुमा आएको खबरप्रति ध्यानाकर्षण भएको समेत उल्लेख गरिएको छ ।

गाउँपालिकाले मंगलबार संघीय सरकारको स्वास्थ्य तथा जनसंख्या मन्त्रलायलाई पत्र लेख्दै नोबेल कोरोना भाइरससँग मिल्दोजुल्दो लक्षण देखा परेको भन्दै विज्ञ टोली पठाउन माग गरेको थियो । गुम्बाका स्थानीयमा रुघाखोकी र अत्याधिक ज्वरो देखिएको उपचारमा संलग्न स्वास्थ्य कर्मीको टोली बताएका छन् ।