बनेपा, २८ पुसः धुलिखेल स्थित काठमाण्डौ विश्वविद्यालयका प्राध्यापक र कर्मचारी संघले २४ घण्टाभित्र माग सम्बोधन गर्न चेतावनी दिएका छन । एक प्रेस विज्ञाप्ति जारी गर्दै उनीहरुले २४ घण्टाभित्र आफुहरुको माग सम्बोधन नभए आन्दोलनका थप कार्यक्रम घोषणा गर्ने केयु प्रशासनलाई चेतावनी दिएका हुन ।

केयु प्राध्यापक संघ र कर्मचारी संघले पुस १५ गते देखि विश्व विद्यालयका उपकुलपति, रजिष्ट्रार, डीनहरु, परीक्षा नियन्त्रकको कार्यालय, टि.टि.सि., प्रशासकीय भवन लगायत केयुको धुलिखेलमा रहेका सबै कार्यालय बन्द गरिदिएका छन् । भदौ ३० गतेको बैठकले गरेका निर्णयहरु कार्यान्वयन नगरे केयुका स्कूल र विभागका कार्यालयहरुमा धुलिखेल क्याम्पसमा जस्तै कार्यक्रमहरु गर्ने प्राध्यापक संघका अध्यक्ष वेदमणि दाहालले जानकारी दिए ।

उनीहरुले तीन सुत्रिय माग राखेर अल्टिमेटम दिएका हुन । गएको भदौ ३० गते भएको सम्झौता विपरित आगामी माघ १३ गते बोलाइएको कार्यकारी परिषदको ५९१ औ बैठक खारेज गर्न माग गरेको छ । त्यस्तै कार्यकारी परिषदको ५९० औ बैठकको निर्णण्य बमोजिम टि.टि.सि., क्यान्टिन र सवारी चालक सेवामा कार्यरत कर्मचारीहरुलाई सेवा समायोजनको पत्रजारी गर्नुपर्ने माग छ ।

त्यसैगरी उक्त सम्झौता बमोजिम प्राध्यापक संघका सभापति र कर्मचारी संघका अध्यक्षलाई विशेष सभाको एजेण्डा र प्रस्ताव सहितपत्र जारी गर्न पनि भनेका छन् ।

केयुमा झण्डै १५ हजार पठनपाठन गर्छन । आन्दोलनका कारण उनीहरुको पठनपाठन पनि  प्रभावित भएको छ ।