काठमाण्डौ, १९ मंसिर: काभ्रेको धुलिखेल नगरपालिका वडा नम्बर ११ पात्लेखेतमा रहेको हनुमान मावि परिसरभित्रको मदिरा तथा सुर्तीजन्य पदार्थ हटाउन दबाब बढेको छ ।

बिहिबार नेकपाको भ्रातृ संगठन अनेरास्ववियूले धुलिखेल नगरपालिकामा पसल हटाउन माग गर्दै ज्ञापनपत्र बुझाएको हो । विद्यालय हाताभित्र मदिरा बेचविखन गर्न नपाउने भन्दै ज्ञापनपत्र बुझाएको अनेरास्ववियूका धुलिखेल नगर इन्चार्ज मिलन गौतमले बताउनुभयो ।

हनुमान मावि परिसरभित्र खुल्लाम खुल्ला मदिरा र सुर्तीजन्य पदार्थ बेचविखन भइरहेको खबर बुधबार रेडियो नमोबुद्ध र खबरघर अनलाइनले प्रसारण तथा प्रकाशन गरेका थिए । विद्यालय प्रशासनले गएको असोज ९ गते एक सुचना जारी गर्दै तीन दिनभित्र मदिरा र धुम्रपान बेचविखन नगर्न आग्रह गरेपनि अहिलेसम्म कुनै पनि पसलले कार्यान्वयन गरेका छैनन् ।

विद्यालयकै भवन सटर भाडामा लिएर पसल ब्यवसाय चलाई रहेका ब्यापारीहरुले मदिरा र सुर्तीजन्य पदार्थ बेचविखन गरिरहेका हुन् । सुर्तिजन्य पदार्थ नियन्त्रण र नियमन गर्न २०६८ सालमा बनेको ऐन अनुसार विद्यालयको दुईसय मिटर वरपरको क्षेत्रमा मदिरा र सुर्तिजन्य सामग्री बेचविखन गरे कारबाही हुने ब्यवस्था छ । अनेरास्ववियूका धुलिखेल नगरअध्यक्ष रमेश धितालद्धार हस्ताक्षरित ज्ञापनपत्रमा भनिएको छ ‘विद्यालयको आफ्नै सटरहरुमा रहेको होटलदेखि किराना पलसहरुमा सुर्तिजन्य पदार्थ बेचविखन गरिरहेको हुँदा सुर्तिजन्य पदार्थ नियन्त्रण र नियमन गर्न २०६७ बमोजिम एक हप्ताभित्र हटाउन अनुरोध गरिन्छ ।’

विद्यालय ब्यवस्थापन समितिका अध्यक्ष बाबुराम धितालले विद्यालय हाताभित्र मदिरा तथा सुर्तीजन्य पदार्थ बेचविखन नभएको दाबी गर्छन । तर विद्यालयका प्रधानाध्यपक देवीप्रसाद ढुंगानाले विद्यालय परिसरभित्रका पसलहरुबाट मदिरा र सुर्तीजन्य सामग्रीको बेचविखन नहटेको बताए ।

ज्ञापनपत्र