धुलिखेल, २२ भदौँ : काभ्रेको तेमाल गाउँपालिकालाई पुर्ण साक्षर गाउँपालिका घोषणा गरिएको छ ।

आइतबार पोखरीनारायणस्थानमा एक कार्यक्रमको आयोजना गरी जिल्ला समन्वय समितिका प्रमूख उद्धव केसीले तेमाल गाउँपालिककालाई पूर्ण साक्षर गाउँपालिका घोषणा गरेका हुन् ।

तेमालको कुल जनसंख्याको ९५.९७ प्रतिशत जनसंख्या साक्षर भएपछि सिँगो पालिकालाई नै पूर्ण साक्षर घोषणा गरिएको पालिका प्रमूख सलाम सिंह तामाङले बताए ।

तेमालमा १२ हजार १ सय २९ महिला र १० हजार ५ सय ८३ गरी जम्मा २२ हजार ७ सय १२ जनसंख्या रहेको छ । तेमालमा बसोबास गर्ने कुल जनसंख्याको ४.०३ प्रतिशत अर्थात ९१५ जना साक्षर हुन बाँकी रहेका छन् । तेमाल गाउँपालिकामा रहेको तत्कालिन गाविस मध्ये कुरुवास चापाखोरीमा सतप्रतिशत जनसंख्या साक्षर भएको तथ्यांकले देखाएको छ ।

सबैभन्दा कम साक्षर सरमथलीमा रहेका छन् । यहाँ कुल जनसंख्याको ७२.९२ प्रतिशत साक्षर रहेको पालिकाका प्रमूख प्रशासकीय अधिकृत लक्ष्मण कुइकेलले बताए । यसैगरी बोल्देफेँदिचे (९७.११%), ठूलोपर्सेल (९७.०९%), पोखरीनारायणस्थान (९५.९३%), सस्र्यूँखर्क (९५.९४%), मेच्छे (९२.६२%)  साक्षर भएको पालिकाको शिक्षा शाखा प्रमूख भोजकुमार ठकुरीले जानकारी दिए । हाल तेमालमा ४१ वटा विद्यालय र तीन शिकाई केन्द्र रहेका छन् ।

कार्यक्रममा जिसस प्रमूख केसीले तेमालको शिक्षालाई समाज अनुकुल बनाउन सुझाव दिए । उनले भने प्रविधियुक्त शिक्षामा पालिकाले लगानी गर्ने बेला भइसक्यो । यहाँको बुद्धचित्त लगाउने देखि प्रशोधन गर्ने सीप र ज्ञान शिक्षाको माध्यमबाट दिन जरुरी छ । शिक्षा अब समाज सुहाउँदो भएन भने एकातर्फ बेरोजगार बढ्दै जाने र यसले समाजलाई नै नकारात्मक दिशातर्फ डोहोर्याउन सक्छ, तेमालको साक्षर गाउँपालिका घोषणा कार्यक्रममा प्रमुख के.सी.ले भने ।

पालिका उपप्रमूख दुर्गामाया तामाङले बाँकी निरक्षर संख्यालाई साक्षर बनाउन र साक्षर भएकाहरुको सिकाइलाई दिगो बनाउन निरन्तर शिक्षाको कार्यक्रम लागू गर्ने नीति लिएको बताइन् । उनले साक्षरता मानव विकासको सुचाकांकको एक आधार खुड्किलो भएको भन्दै साक्षर घोषणालाई ब्यवहारिक रुपमै स्थापित गर्न र सिकाईलाई दैनिक जीवन रुपान्तरणसँग जोडेर अनेकन कामहरु गर्दै जानेमा आफू विश्वास्त रहेको बताइन् ।

तेमालको शान :  पूर्ण साक्षर गाउँ, हाम्रो पहिचान भन्ने नाराका साथ साक्षर गाउँपालिकिा घोषणा पत्र २०७६ प्रमुख प्रशासकीय अधिकृत लक्ष्मण कुईकेलले प्रस्तुत गरेका थिए । कार्यक्रममा तेमाल गाउँपालिका वडा नं ६ का अध्यक्ष विकुलाल तामाङले आगामी दिनमा सबै साक्षर घरका परिवारबाट निरक्षर अभियान संचालन गर्नुपर्ने बताए ।