धुलिखेल १७ बैशाख : काभ्रे जिल्लाको ब्यापारिक नगर बनेपामा खुल्ला नाइन ए साइट फुटबल प्रतियोगिता हुने भएको छ ।

यहि बैशाख २० गतेदेखि जेठ २ गतेसम्म चल्ने प्रतियोगिताको आयोजना बनेपा ब्वाइज क्लब (बीबीसी) ले गरेको हो । प्रतियोगिता बनेपा बहुप्राविधिक शिक्षालयको खेल मैदानमा हुनेछ ।

मंगलबार बनेपामा पत्रकार सम्मेलन गरी दिइएको जानकारी अनुसार प्रतियोगितामा विभिन्न ठाउँका ३६ वटा टिमको सहभागिता रहनेछ ।

प्रतियोगिताको बिजेता टिमले नगद २ लाख रुपैयाँ  र ट्रपि पाउने छ भने उपविजेता १ लाख रुपैँया नगद प्राप्त गर्ने बीबीसी क्लबका अध्यक्ष महेश कर्माचार्यले जानकारी दिए ।

प्रतियोगितामा उत्कृष्ट गोलकिपर, मिडफिल्ड, फरवार्ड, सर्वाधिक गोलकर्ता र प्रशिक्षकले नगद ५ हजार रुपैयाँ पाउने प्रतियोगिताको मूख्य संयोजक मणि कुमार तुम्रोकले बताए । त्यस्तै अनुशासित टिमले १० हजार रुपैयाँ पाउनेछ । हरेक खेलबाट छनौट हुने म्यान अफ दी म्याचका लागि २ हजार रुपैँया प्रदान गरिनेले आयोजकले बताएको छ ।