रसुवा, २५ माघ : राजमार्ग क्षेत्रमा हुने सवारी दुर्घटना न्यूनीकरण गर्ने उद्देश्यले ट्राफिक प्रहरीद्वारा पहिलोपटक चालकको स्वास्थ्य परीक्षण शुरु गरिएको छ । जिल्ला ट्राफिक प्रहरी इञ्चार्ज नवराज खड्काका अनुसार ट्राफिक प्रहरी निर्देशनालय एवं ३ नम्बर प्रदेश ट्राफिक प्रहरी कार्यालय चितवनको निर्देशनमा पासाङल्हामु राजमार्गमा गुड्ने साना ठूला सबै खाले सवारी साधनका सवारी चालक र चालकका लागि योग्य हुँदै गरेका सहचालककोे आँखा तथा उच्च रक्त चाप परीक्षण शुरु गरिएको हो ।

ट्राफिक प्रहरीको आयोजना, नेपाल रेडक्रस एवं रसुवा सामुदायिक आँखा केन्द्रको प्राविधिक सहयोगमा बिहीबारदेखि चालकका लागि सञ्चालित स्वास्थ्य तथा आँखा परीक्षण कार्यलाई निरन्तरता दिइने बताइएको छ । परीक्षण गरिएका ५२ मध्ये ४८ चालक तथा चार सहचालक छन् । तीमध्ये नौको आँखाको शक्ति कमजोर भेटिएको र तीनको उच्च रक्तचाप पाइएको थियो ।

आँखाको कमजोरी भएकाका लागि थप परीक्षण गरी चस्मा लगाउन र उच्च रक्तचाप भएकालाई छिटो स्वास्थ्य परीक्षण गराई उपचारको साथै खानपिनमा सन्तुलन ल्याउन सुझाव दिइएको ट्राफिक प्रहरीले जनाएको छ ।
-रासस