बनेपा, १९ कात्तिक: नेपाल कम्युनिष्ट पार्टी (नेकपा)का प्रवक्ता नारायणकाजी श्रेष्ठले नेपाल विश्वका कम्युनिष्टका लागि अध्ययनको सन्दर्भ सामग्री भएको बताउनुभएको छ । काभ्रेपलाञ्चोकको धुलिखेलमा नेकपा धुलिखेल नगर कमिटीले आज आयोजना गरेको तिहार, छठ र नेपाल संवत्का अवसरमा आयोजित शुभकामना आदानप्रदान कार्यक्रममा उहाँले नेपालको लोकतन्त्र सशस्त्र सङ्घर्ष, जनयुद्ध, जनआन्दोलन र शान्ति प्रक्रियाको बाटोबाट अगाडि बढेकाले नेपाल विश्वका लागि अध्ययनको सन्दर्भ सामग्री भएको जिकिर गर्नुभयो ।

नेता श्रेष्ठले नेपालमा बनेको तीन तहको सरकार गठन गर्ने शक्तिका रुपमा नेकपा स्थापना भएको उल्लेख गर्दै नेपाल विश्व कम्युनिष्ट आन्दोलनका लागि नयाँ आयाम भएको बताउनुभयो । नेपाली समाजले राजनीतिक क्रान्ति पूरा गरेर नयाँ चरणमा प्रवेश गरिसकेको उहाँको भनाइ थियो ।

उहाँले पार्टीलाई तल्लो तहसम्मको एकीकरण गर्न नसकेकै कारण लाखौँ नेता कार्यकर्ता जिम्मेवारीविहीन भएर बस्नुपरेको र सोचेजस्तो काम गर्न नसकिएकोले त्यसको दोष पार्टी नेतृत्व र सचिवालयले लिनुपर्ने बताउनुभयो । उहाँले सांस्कृतिक पर्वले दिएको सकारात्मक प्रभाव जीवन व्यवहारमा उपयोग गर्न र नकारात्मक पक्षको विकासलाई नियन्त्रण गर्दै अगाडि बढ्न आग्रह गर्नुभयो ।
-रासस