काठमाडौं, असोज २१ : गृहमन्त्रालयले नेपाल प्रहरीका ११ जना प्रहरी वरिष्ठ उपरीक्षक (एसएसपी) लाई डीआईजीमा बढुवाका लागि सिफारिस गरेको छ ।  गृहमन्त्रालय अन्तरगत बढुवा समितिको शनिबार बसेको बैठकले विनोद शर्मा घिमिरे, विकास श्रेष्ठ, ठाकुरप्रसाद ज्ञवाली र पूर्णचन्द्र जोशीसहित एघार एसएसपीलाई डीआईजीमा बढुवाका लागि सिफारिस गरेको हो ।

डीआईजीमा बढुवाका लागि सयमा ७२ अंकसहित पहिलो नम्बरमा विनोद शर्मा घिमिरे सिफारिस भएका छन् । त्यसपछि दोस्रो र तेस्रोमा विकास श्रेष्ठ र ठाकुरप्रसाद ज्ञवाली रहेका छन् । डीआईजीमा बढुवाका लागि सिफारिस हुने अन्य एसएसपीहरुमा तारिणीप्रसाद लम्साल, प्रहरी प्रवक्ता रहेका शैलेश थापा क्षेत्री, हरिबहादुर पाल, निरजबहादुर शाही, प्रद्युम्न कार्की, हरिभक्त प्रजापति र सूर्यप्रसाद उपाध्याय रहेका छन् ।

बढुवा समितिका सदस्य सचिव एआईजी ठुले राईद्वारा शनिबार हस्ताक्षरित सिफारिस अनुसार जनपद प्रहरी समूहतर्फका एसएसपीहरुलाई त्यही समूहतर्फ डीआईजी पदका लागि प्रहरी नियमवाली २०७१ (संशोधनसहित) को नियम २७ को उपनियम (४) को प्रावधान अनुसार बढुवाका लागि सिफारिस गरिएको हो ।
-अन्नपूर्ण पोष्ट