धुलिखेल/ फ्लोरिकल्चर एशोसियसन नेपाल काभ्रे शाखाको अध्यक्षमा विरेन्द्र बहादुर श्रेष्ठ सर्बसम्मत निर्वाचित भएका छन् ।

शुक्रबार धुलिखेलमा भएको ७ औँ साधारण सभा तथा तेस्रो अधिवेशनले श्रेष्ठलाई अध्यक्षमा सर्वसम्मत चयन गरेको हो । श्रेष्ठ विगत १७ वर्ष देखि पुष्प खेतीमा आबद्ध छन् ।

अधिवेशनबाट उपाध्यक्षमा भेष बहादुर दनुवार, सचिवमा शम्भु तामाङ र कोषाध्यक्षमा रुद्र बहादुर खड्का पनि निर्विरोध निर्वाचित भएका छन् । त्यस्तै सदस्यहरुमा किरण खरेल, जर्नादन गौतम र ठाकुर प्रसाद दाहाल चयन भएका छन् ।

अध्यक्षमा सर्वसम्मत निर्वाचित भएपछि श्रेष्ठले जिल्लामा पुष्प खेतीको विस्तार र विकासमा आफ्नो पुरै कार्यकाल लगाउने प्रतिबद्धता ब्यक्त गरे । ‘खेती योग्य जमिन खण्डिकरण भइरहेको छ उनले भने ‘यो विषयमा पनि जिल्लाका सबै स्थानीय निकायलाई सचेत गराउँदै सम्भावित ठाउँमा पुष्प खेतीको विकास र विस्तारमा ध्यान केन्द्रित गर्नेछु ।’

यसैबीच फ्लोरिकल्चर एशोसियसन नेपालले तेस्रो अधिवेशनका अवसर पारेर पत्रकार प्रकाश सुन्दासलाई सम्मान गरेको छ । पत्रकारिताको माध्यमबाट पुष्प खेतीको प्रचारप्रसारमा योगदान पुर्याएको भन्दै पत्रकार सुन्दासलाई सम्मान गरिएको फ्लोरिकल्चर एशोसियसन नेपालका नवनिर्वाचित उपाध्यक्ष भेष बहादुर दनुवारले बताए । सुन्दास झण्डै एक दशक देखि काभ्रे जिल्लामा सक्रिय रुपमा पत्रकारिता गरिरहेका छन् ।