नेपालगञ्ज, १२ कात्तिक: नेपाली काङ्ग्रेसका सहमहामन्त्री डा प्रकाशशरण महतले वर्तमान सरकारले जनअपेक्षाअनुसार काम गर्न नसकेको टिप्पणी गर्नुभएको छ । काङ्ग्रेसको केन्द्रीय आर्थिक नीति मस्यौदा समितिले आज यहाँ आयोजना गरेको आर्थिक नीतिसम्बन्धी प्रस्ताव तयारी कार्यशालामा सहमहामन्त्री डा महतले समृद्ध नेपाल र सुखी नेपालीको नारा अघि सारिए पनि सरकार समृद्धिलाई खुम्च्याउनतिर उद्यत रहेको बताउनुभयो ।

मस्यौदा समितिका संयोजक डा महतले बिपी कोइरालाले प्रतिपादन गरेको प्रजातान्त्रिक समाजवादले नै मुलुकलाई समृद्धितर्फ लैजान सक्ने भएकाले यसको समय सान्दर्भिक व्याख्या र परिमार्जन गर्दै पार्टी अघि बढ्ने विश्वास दिलाउनुभयो ।

त्यस अवसरमा केन्द्रीय सदस्यहरु एनपी साउद, बहादुरसिंह लामा, पार्वती डिसी चौधरी, जीवनबहादुर शाही, राष्ट्रिय योजना आयोगका पूर्वउपाध्यक्ष डा गोविन्द पोखरेल, बाँके काङ्ग्रेसकी सभापति किरण कोइरालालगायतले बोल्नुभएको थियो । प्रदेश नं ५ का सबै जिल्लाका पार्टी सभापति, अगुवा नेता, कार्यकर्ताको कार्यशालामा सहभागिता रहेको थियो ।