काठमाडौं, कात्तिक ८ : स्वास्थ्य तथा जनसंख्या मन्त्रालयमा १२औँ तह (प्रमुख विशेषज्ञ)को दुई दरबन्दी डेढ वर्षदेखि रिक्त छ । मन्त्रालयमा १२औँ तहका तीन दरबन्दी छन् । स्वास्थ्य तथा जनसंख्या मन्त्रालय र स्वास्थ्य सेवा विभागमा गरी दुई प्रमुख विशेषज्ञको दरबन्दी रिक्त रहेको मन्त्रालयका कर्मचारी प्रशासन शाखाका उपसचिव बाबुराम खनालले जानकारी दिए । मन्त्रालयबाट भर्खरै प्रधानमन्त्री कार्यालयमा तानिएकी सचिव डा. पुष्पा चौधरीले बढुवा सिफारिसमा अग्रसरता नदेखाउँदा प्रमुख विशेषज्ञको तीनमध्ये दुई पद रिक्त रहेको हो ।

प्रमुख विशेषज्ञको दरबन्दी खाली रहेको लोकसेवालाई पनि जानकारी गराइएको छैन । लोकसेवा आयोगका अध्यक्ष उमेशप्रसाद मैनालीले रिक्त दरबन्दीबारे जानकारी नआएको बताए । मैनालीले भने, ‘बढुवा समितिको सदस्यसचिवको हैसियतले स्वास्थ्य सचिवले दरबन्दी रिक्त रहेको जानकारी गराउनुपर्ने हो, तर यस विषयमा आयोगलाई कुनै जानकारी छैन ।’ १२औँ तह सचिवसरहको पद हो । मन्त्रालयका अनुसार हालसम्म बढुवा सिफारिस समितिको बैठक बस्न सकेको खबर अाजकाे नयाँ पत्रिकाले लेखेकाे छ ।