काठमाडौं, भदौ २५ । ललितपुरका दुई बालिकालाई ललाइफकाइ आफ्नो कोठामा पुर्‍याएर बन्धक बनाइ बलात्कार गर्ने एक युवकलाई प्रहरीले पक्राउ गरेको छ ।पक्राउ पर्नेमा काठमाडौंको कीर्तिपुर बस्दै आएका २५ वर्षीय हेम खत्री रहेका छन् । उनलाई कीर्तिपुरबाटै पक्राउ गरिएको प्रहरीले जनाएको छ ।

घरबाट रिसाएर हिँडेका ललितपुर, इमाडोलका ११ र १३ वर्षीया दिदीबहिनीलाई खत्रीले बसमा भेटाएको र फकाएर आफ्नो डेरामा पुर्‍याएर चार दिनसम्म बन्धक बनाएर राखेको प्रहरी अनुसन्धानले देखाएको महानगरीय प्रहरी परिसर काठमाडौंका प्रमुख वसन्त लामाले जानकारी दिए ।

दुई बालिकामध्ये एकजनालाई खत्रीले भदौ २३ गते छाडिदिएको र अर्कीलाई भने प्रहरीले सोमबार उद्धार गरेको जनाइएको छ । पक्राउ परेका खत्रमाथि अपहरण तथा शरीर बन्धक र जबर्जस्ती करणी अभियोगमा मुद्दा दर्ता गरेर अनुसन्धान थालेको प्रहरीले जनाएको छ ।