काठमाडौं, भदौ २२ । नेपाल पत्रकार महासंघले प्रेस तथा अभिव्यक्ति स्वतन्त्रता संकुचित नगर्न माग गदै विरोध प्रदर्शन गरेको छ ।शुक्रबार राजधानीको नयाँबानेश्वरमा प्रदर्शन गदै प्रेस तथा अभिव्यक्ति स्वतन्त्रता संकुचित गर्ने फौजदारी कानुन संशोधन गर्न माग गरिएको हो ।मुलुकी संहितामा रहेको व्यवस्थाले सार्वजनिकस्थलमा तस्वीर खिच्नदेखि सार्वजनिक पद धारण गरेका व्यक्तिहरुका गलत कामकोसमेत समाचार बनाउन नपाउने अवस्था आएको उनीहरुको भनाइ थियो ।
कार्यक्रममा महासंघका अध्यक्ष गोविन्द आचार्यले मुलुकी संहिताका केही प्रावधानले प्रेस स्वतन्त्रता कुन्ठित गरेकाले त्यसलाई तत्काल नसच्याए देशैभर आन्दोलन गर्ने चेतावनी दिए ।महासंघका उपाध्यक्ष दिलीप थापामगर, प्रेस युनियनका महासचिव अजयबाबु शिवाकोटी, सम्पादक समाजका अध्यक्ष पुरु रिसाललगायतले नेता र सरकारलाई आफ्नो विगत नबिर्सन आग्रह गरेका थिए । विरोध कार्यक्रममा सत्ताधारी दलनिकट पत्रकारहरुका संगठनहरुको भने उपस्थिति थिएन ।
प्रतिक्रिया