काठमाडौं, भदौ १३ । नेपाल प्रहरीको केन्द्रीय अनुसन्धान ब्यूरोले सिटिजन्स बैंक इन्टरनेसनल लिमिटेडलाई रु दुई करोड २८ लाख ३८ हजार ४०१ हानि पुर्‍याउने ६ जनालाई पक्राउ गरी बुधबार सार्वजनिक गरेको छ ।

बैंकको न्यूरोड शाखाका कर्मचारी र सुन ऋणीको मिलेमतोमा धितोबापत राखिएको सुन ऋण चुक्ता नहुँदै फिर्ता दिने तथा अपुग सुनसमेत राखी विभिन्न समयमा ऋण प्रवाह गरी बैंकलाई हानि पुर्‍याउने ती व्यक्तिलाई पक्राउ गरिएको ब्यूरोले जनाएको छ ।

पक्राउ पर्नेमा बैंकका कर्मचारीहरु वरिष्ठ सुन जाँचक भक्तपुरका सामिन शाक्य र सहायक सुन जाँचक विन्देश शाक्य, प्राइम कमर्सियल बैंक गोल्ड अडिट विभागका अमितराज बज्राचार्य, ऋणी मोरङ, शनिश्चरेका लभ बराइली र संखुवासभा, चैनपुरका उमेशराज बराइली छन् ।पक्राउ परेकालाई उच्च अदालत पाटनबाट बुधबार सात दिनकोे म्याद थप गरी बैंकिङ कसुर तथा सजाय ऐनबमोजिम अनुसन्धान भइरहेको ब्यूरोले जनाएको छ ।