गएको बिहिबार राति अविरल बर्षासँगै आएको बाढीले काभ्रेपलाञ्चोक जिल्लामा पुष्प ब्यवसाय नराम्ररी प्रभावित बनेको छ । फ्लोरिकल्चर एशोसिएन अफ नेपाल काभ्रेका अनुसार उक्त दिनको बाढीले २ करोड ४२ लाख ५० हजार मूल्य बराबरको फूल खेतीमा क्षति पुगेको हो ।पुण्यमाता खोलामा आएको बाढीले सबैभन्दा बढी धुलिखेल नगरपालिका वडा नम्बर ५ श्रीखण्डपुरमा रहेको होरिजन नर्सरी प्रभावित भएको छ । नर्सरीका सञ्चालक विरेन्द्र श्रेष्ठका अनुसार कार्नेशन जातको फूलको ३० हजार वटा विरुवा र २ हजार वटा लिमूनियन फूलका विरुवा बाढीबाट नोक्सानी भएका छन् ।

बाढीले पुण्यमाता खोला आसपास सञ्चालनमा रहेका अधिकांश पुष्प फार्म प्रभावित भएका छन् । बाढीबाट जर्बेरा, गुलाफ, गोदावारी, एस्टोमारिया र सयपत्रीका गरी ५५ हजार ५ सय बोट विरुवामा क्षति पुगेको फ्लोरिकल्चर एशोसिएन अफ नेपाल काभ्रेका सचिव भेष बहादुर दनुवारले जानकारी दिए ।

बाढीले पुर्याएको क्षतिको शनिबार पुष्प विकास केन्द्र गोदावरीका केन्द्र प्रमूख द्रोणनाथ काफ्ले, फ्लारेकिल्चर एशोसिएन अफ नेपालका केन्द्रिय अध्यक्ष कुमार कसजुसहितको टोलीले स्थलगत निरिक्षण समेत गरेको छ । पुष्प खेतीको बिमा गर्न समेत कानुनी रुपमा समस्या रहेको भन्दै अध्यक्ष कसजुले विपदबाट हुने क्षतिको परिपूर्ती गर्न आगामी दिनमा छुट्टै कोषको ब्यवस्था गरिने बताए । काभ्रे जिल्लामा ब्यवसायीक रुपमा दर्ता भएका १७ वटा पुष्प फार्म रहेका छन् ।