काठमाडौं । नेकपा एमालेले मनोनीत गरेका १३ जना केन्द्रीय सदस्यलाई आज शपथ गराउने भएको छ। पार्टी केन्द्रीय कार्यालय च्यासलमा दिउँसो २ बजे शपथ ग्रहण कार्यक्रम आयोजना गरिने प्रचार विभाग प्रमुख निरज आचार्यले जानकारी दिएका छन्।

पार्टी अध्यक्ष केपी शर्मा ओलीले मनोनीत सदस्यहरूलाई पद तथा जिम्मेवारीको शपथ गराउने कार्यक्रम रहेको छ। एमालेको असोज २२ गतेदेखि तीन दिनसम्म चलेको पहिलो स्थायी कमिटी बैठकले विभिन्न जिल्लाबाट प्रतिनिधित्व हुने गरी १३ जनालाई केन्द्रीय सदस्यमा मनोनयन गर्ने निर्णय गरेको थियो। शपथ लिनेहरूमा भोजपुरकी सिर्जना राई, रुपन्देहीकी सावित्रा अर्याल, कञ्चनपुरकी इन्दु कडरिया विष्ट, नवलपुरकी सीता पंगेनी, पाल्पाकी सीता अधिकारी र कास्कीकी डा. पुष्पा केसी भण्डारी रहेका छन्।

त्यस्तै, सिराहाका धर्मनाथ प्रसाद साह, तेह्रथुमका तेजमान कन्दङवा, ताप्लेजुङका टंक आङ्वोहाङ, रोल्पाका नवीन रोक्का, स्याङ्जाका मीनप्रसाद गुरुङ, दोलखाका डवल पाण्डे र रुपन्देहीका तेजेन्द्र केसीले पनि आज शपथ लिनेछन्। शपथ ग्रहणसँगै उनीहरूले पार्टीको केन्द्रीय कमिटीमा औपचारिक रूपमा जिम्मेवारी सम्हाल्नेछन्।