काठमाडौं । देशमा पश्चिमी न्यून चापीय प्रणालीसँगै मनसुनी वायुको प्रभाव कायम रहेकाले आज पनि अधिकांश भूभागमा मौसम बदली रहने भएको छ। मौसम पूर्वानुमान महाशाखाका अनुसार केही स्थानमा मेघगर्जन, चट्याङ, हावाहुरी र असिनासहित वर्षा हुने सम्भावना छ।

हिमाली तथा पहाडी क्षेत्रमा सामान्यतया बादल लाग्नेछ भने तराई क्षेत्रमा आंशिकदेखि सामान्य बदली रहने अनुमान गरिएको छ। कोशी, बागमती, गण्डकी, कर्णाली र सुदूरपश्चिमका केही स्थानमा तथा लुम्बिनीका एक–दुई स्थानमा वर्षा भइरहेको छ। दिउँसो हिमाली क्षेत्रका थोरै तथा पहाडी क्षेत्रका केही स्थानमा मेघगर्जन र चट्याङसहित मध्यम वर्षा हुन सक्नेछ। केही क्षेत्रमा हावाहुरी र असिनाको समेत सम्भावना रहेको छ। लुम्बिनी र सुदूरपश्चिमका तराई क्षेत्रमा केही स्थानमा तथा मधेशसहित कोशी, बागमती र गण्डकीका तराई क्षेत्रमा थोरै स्थानमा पनि मेघगर्जनसहित वर्षा हुने अनुमान छ। लुम्बिनी र सुदूरपश्चिमका पहाडी तथा तराई क्षेत्रसँगै बागमती, गण्डकी र कर्णालीका पहाडी भूभागका एक–दुई स्थानमा भारी वर्षाको सम्भावना रहेको छ।

रातिको समयमा कोशी प्रदेशसहित देशका हिमाली तथा पहाडी क्षेत्रमा सामान्य बदली रहनेछ। हिमाली भूभागका एक–दुई स्थानमा हल्का वर्षासँगै हिमपात पनि हुन सक्ने मौसमविद्को अनुमान छ। यस्तै, कर्णाली र सुदूरपश्चिमका पहाडी क्षेत्रमा केही स्थान तथा कोशी, बागमती, गण्डकी र लुम्बिनीका पहाडी भूभागका एक–दुई स्थानमा मेघगर्जन र चट्याङसहित मध्यम वर्षा हुन सक्नेछ। तराईका केही स्थानमा पनि वर्षाको सम्भावना रहेको छ। मौसममा आएको परिवर्तनसँगै चट्याङ, हावाहुरी, असिना र भारी वर्षाबाट हुन सक्ने जोखिमप्रति सतर्क रहन सम्बन्धित निकायले आग्रह गरेको छ।