काठमाडौं । नेपाली कांग्रेसको १५औँ महाधिवेशनलाई लक्षित गर्दै काठमाडौं उपत्यकाको सुरक्षा व्यवस्था कडा पारिएको छ। महाधिवेशनस्थल खुलामञ्चसहित प्रतिनिधि तथा शीर्ष नेताहरूको आवतजावत हुने क्षेत्रमा ठूलो संख्यामा सुरक्षाकर्मी परिचालन गरिएको छ।

आज दिउँसो २ बजे खुलामञ्चमा हुने उद्घाटन समारोहका लागि देशभरबाट प्रतिनिधि काठमाडौं आउने क्रम जारी छ। उद्घाटन सत्रमा विभिन्न राजनीतिक दलका शीर्ष नेता तथा विदेशी प्रतिनिधिसमेत सहभागी हुने कार्यक्रम छ।

महाधिवेशनको सुरक्षाका लागि नेपाल प्रहरी, सशस्त्र प्रहरी, केन्द्रीय अनुसन्धान ब्युरो (सीआईबी), ट्राफिक प्रहरी तथा सादा पोशाकका प्रहरी परिचालन गरिएको छ।

प्रतिनिधिहरू बसेका होटल, शीर्ष नेताहरूको आवतजावत हुने क्षेत्र तथा महाधिवेशनस्थलमा विशेष सुरक्षा योजना लागू गरिएको प्रहरीले जनाएको छ।

सुरक्षा जाँच तथा निगरानीलाई थप प्रभावकारी बनाउन महाधिवेशनस्थलमा तालिम प्राप्त कुकुरसमेत परिचालन गरिएको छ।