काठमाडौं । काठमाडौंको ऐतिहासिक तथा सांस्कृतिक पर्व इन्द्रजात्रा राष्ट्रपति रामचन्द्र पौडेलसहित विशिष्ट अतिथि तथा विदेशी पाहुनाहरूले अवलोकन गरेका छन्।

इन्द्रजात्राका अवसरमा राष्ट्रपति पौडेल जुद्ध सालिकदेखि पैदल हनुमानढोका दरबार क्षेत्रस्थित गद्दी बैठकसम्म पुगेका थिए। राष्ट्रपति पौडेल दम्पतीलाई काठमाडौं महानगरपालिकाकी कार्यवाहक मेयर सुनिता डंगोलले स्वागत गरेकी थिइन्। इन्द्रजात्रा अवलोकनका लागि उपराष्ट्रपति, सभामुख, कार्यवाहक प्रधानमन्त्री डा. स्वर्णिम वाग्ले र गृहमन्त्री सुधन गुरुङ पनि वसन्तपुर पुगेका छन्। विभिन्न मुलुकका विदेशी पाहुना तथा विशिष्ट व्यक्तिहरूको समेत वसन्तपुरमा उपस्थिति रहेको छ। उनीहरूले काठमाडौंको मौलिक सांस्कृतिक परम्परा र इन्द्रजात्राका विभिन्न गतिविधिको प्रत्यक्ष अवलोकन गरेका छन्।

प्रधानमन्त्री वालेन्द्र शाह भने संयुक्त राष्ट्रसंघको ८१औँ महासभामा सहभागी हुन अमेरिकाको न्यूयोर्कमा रहेका कारण इन्द्रजात्रामा उपस्थित छैनन्। राष्ट्रपति पौडेलले परम्पराअनुसार वसन्तपुरस्थित गद्दी बैठकबाट जीवित देवी कुमारी, गणेश र भैरवको रथयात्रा अवलोकन गर्ने कार्यक्रम रहेको छ।

इन्द्रजात्राको मुख्य रथयात्राका लागि वसन्तपुर क्षेत्रमा भक्तजन तथा सर्वसाधारणको बाक्लो उपस्थिति रहेको छ। काठमाडौंको धार्मिक, सांस्कृतिक तथा ऐतिहासिक पहिचानसँग जोडिएको इन्द्रजात्रा प्रत्येक वर्ष विशेष उत्साहका साथ मनाइँदै आएको छ।