काठमाडौं । सरकारले विभिन्न १३ मुलुकका लागि सिफारिस गरेका प्रस्तावित राजदूतमाथि संसदीय सुनुवाइ प्रक्रिया सुरु भएको छ।

संघीय संसद्को संयुक्त संसदीय सुनुवाइ समितिले प्रस्तावित राजदूतका सम्बन्धमा सर्वसाधारण र सरोकारवालाबाट १० दिनभित्र उजुरी दिन आह्वान गरेको हो। बिहीबार बसेको समिति बैठकले सरकारी सञ्चारमाध्यम र संघीय संसद् सचिवालयको विद्युतीय पेजमार्फत उजुरी संकलन गर्ने निर्णय गरेको समिति सभापति बोधनारायण श्रेष्ठले जानकारी दिए।

असोज २० गते बस्ने बैठकमा उजुरी खोलिनेछ। त्यसपछि उजुरीको अध्ययन गरी प्रस्तावित राजदूतहरूलाई क्रमशः संसदीय सुनुवाइका लागि बोलाइने समितिको तयारी छ। सरकारले भारत, चीन, अमेरिका, बेलायत, जापान, इजरायल, स्पेन, जर्मनी, ओमान, मलेसिया, दक्षिण कोरिया, श्रीलंका र साउदी अरेबियाका लागि १३ जनाको नाम राजदूतमा सिफारिस गरेको छ।

संसदीय सुनुवाइबाट अनुमोदन भएपछि सम्बन्धित मुलुकबाट एग्रिमो प्राप्त गर्ने प्रक्रिया अघि बढ्नेछ, त्यसपछि राष्ट्रपतिबाट राजदूत नियुक्त हुने संवैधानिक व्यवस्था छ।