काठमाडौं । डोल्पाको जुफाल विमानस्थलमा सीता एयरको जहाज अवतरणका क्रममा दुर्घटनामा परेको छ। नेपालगन्जबाट उडेको सीता एयरको ९एन–एजे जहाज बिहीबार बिहान करिब ८ः२५ बजे जुफाल विमानस्थलमा अवतरण गर्ने क्रममा रनवेमा दुर्घटनामा परेको हो।

जिल्ला प्रहरी कार्यालय डोल्पाका प्रवक्ता प्रहरी निरीक्षक पदम रावलका अनुसार अवतरणका क्रममा जहाजको पछाडिपट्टिको दायाँ चक्का बाहिर निस्किएपछि जहाज दुर्घटनामा परेको हो। चक्का खुस्किएपछि जहाज केही पर उछिट्टिएको प्रहरीले जनाएको छ।

पाइलटले तत्काल इन्जिन बन्द गरेपछि सम्भावित आगलागीबाट जहाज जोगिएको प्रहरीले जनाएको छ। दुर्घटनापछि जहाज अहिले पनि रनवेमै रहेको छ।

प्रहरीका अनुसार घटनामा कुनै मानवीय क्षति भएको छैन। दुर्घटनाको थप विवरण तथा जहाजमा भएको क्षतिबारे सम्बन्धित निकायले अध्ययन गरिरहेको छ।