काठमाडौं । देशभर मनसुनी गतिविधि सक्रिय बन्दै गएसँगै आज कोशी, बागमती र गण्डकी प्रदेशमा भारी वर्षाको सम्भावना रहेको छ।

बंगालको खाडीमा विकसित न्यूनचापीय प्रणाली थप शक्तिशाली बन्दै पश्चिम–उत्तरपश्चिमतर्फ सर्ने क्रममा रहेकाले वर्षाको गतिविधि बढ्ने मौसम पूर्वानुमान महाशाखाले जनाएको छ।

कोशी, बागमती र गण्डकीका पहाडी तथा हिमाली भूभागमा केही स्थानमा भारी वर्षा हुनसक्नेछ। ती प्रदेशका तराई क्षेत्रमा समेत एक–दुई स्थानमा भारी वर्षाको सम्भावना छ।

यस्तै लुम्बिनी, कर्णाली र सुदूरपश्चिमका पहाडी तथा हिमाली क्षेत्रमा मेघगर्जन, चट्याङसहित वर्षा र हिमपातको सम्भावना रहेको छ। मधेशसहित अन्य तराई क्षेत्रमा पनि मध्यम वर्षा हुनसक्ने पूर्वानुमान छ।

भारी वर्षासँगै पहिरो, बाढी र नदी–खोलामा आकस्मिक बहाव बढ्न सक्ने जोखिम रहेकाले उच्च सतर्कता अपनाउन आग्रह गरिएको छ।