काठमाडौं । भोटेकोशी र त्रिशूली नदीमा आएको बाढीबाट भएको क्षतिको स्थलगत निरीक्षण गर्न नेकपा (एमाले)का महासचिव शंकर पोखरेल नेतृत्वको टोली नुवाकोटतर्फ प्रस्थान गरेको छ।

च्यासलस्थित एमाले केन्द्रीय कार्यालयबाट प्रस्थान गरेको टोलीमा पूर्वउपमहासचिव विष्णु रिमाल, सचिव राजन भट्टराई, स्वास्थ्य विभाग प्रमुख कृष्णगोपाल श्रेष्ठ, प्रचार विभाग प्रमुख निरज आचार्य र केन्द्रीय सदस्य पार्वत गुरुङ सहभागी छन्।

त्यस्तै, जिफन्टका अध्यक्ष विनोद श्रेष्ठ, भूतपूर्व सैनिक तथा प्रहरी संगठनका अध्यक्ष सहायक रथी विनोद पाण्डे (अप्रा.), मोर्चा संगठन प्रमुख विशाल भट्टराई, युवा तथा खेलकुद विभाग प्रमुख अमित लामा तथा प्रेस चौतारी नेपालका अध्यक्ष गणेश पाण्डे पनि निरीक्षण टोलीमा छन्।

एमाले प्रचार विभाग प्रमुख निरज आचार्यका अनुसार टोलीले बाढी प्रभावित क्षेत्रको स्थलगत निरीक्षण गर्नुका साथै स्थानीय बासिन्दासँग अन्तरक्रिया गर्नेछ।

टोलीले स्थानीय तहका जनप्रतिनिधिसँग उद्धार तथा राहत वितरणको अवस्थाबारे जानकारी लिने र स्थानीय प्रशासनसँग उद्धार, राहत तथा पुनर्स्थापनाका विषयमा छलफल गर्ने आचार्यले बताए।

उनका अनुसार बाढी प्रभावित क्षेत्रमा उद्धार तथा राहत कार्यलाई थप प्रभावकारी बनाउन एमालेका स्थानीय नेता तथा कार्यकर्तालाई समेत परिचालन गरिनेछ।

भोटेकोशी र त्रिशूली नदीमा आएको बाढीका कारण नुवाकोटसहित आसपासका जिल्लामा मानवीय तथा भौतिक क्षति भएको छ। बाढी प्रभावित क्षेत्रको अवस्था बुझ्न राजनीतिक दल तथा विभिन्न संघसंस्थाका टोलीहरू स्थलगत निरीक्षणमा जुटिरहेका छन्।