काठमाडौं । रसुवामा आएको बाढीमा परी मृत्यु भएकामध्ये विभिन्न आठ जिल्लाबाट हालसम्म १६२ जनाको शव फेला परेको नेपाल प्रहरीले जनाएको छ।

बिहीबार बिहान ५ बजेसम्मको प्रहरी बुलेटिनअनुसार रसुवा बाढीपछि खोज तथा उद्धारका क्रममा आठ जिल्लाबाट १६२ जनाको शव फेला परेको हो। प्रहरीका अनुसार रसुवामा २, नुवाकोटमा १२, धादिङमा २७, चितवनमा ६४, गोरखामा २०, तनहुँमा ९, नवलपरासी पूर्वमा २६ र नवलपरासी पश्चिममा २ जनाको शव फेला परेको छ।

बाढी प्रभावित क्षेत्रमा अझै खोज तथा उद्धार कार्य जारी रहेको प्रहरीले जनाएको छ। बेपत्ता तथा प्रभावित व्यक्तिको खोजीका लागि सुरक्षा निकाय परिचालन गरी सम्भावित स्थानमा खोजी कार्यलाई तीव्रता दिइएको छ।