काठमाडौं । इजरायलको आगामी आमनिर्वाचनमा प्रधानमन्त्री बेन्जामिन नेतन्याहुको लिकुड पार्टीलाई पूर्वसेनाप्रमुख गादी आइजेनकोट नेतृत्वको यशार पार्टीले पछि पार्ने नयाँ सर्वेक्षणले देखाएको छ।

जमान इजरायलले सार्वजनिक गरेको सर्वेक्षणअनुसार यशारले २५ सिट जित्ने अनुमान गरिएको छ भने लिकुडले २१ सिट पाउने प्रक्षेपण छ। यससँगै आइजेनकोटको पार्टीले नेतन्याहुको दलमाथि चार सिटको अग्रता बनाएको छ।

तर यशारको अग्रता मात्रै सरकार गठनका लागि पर्याप्त देखिँदैन। १२० सदस्यीय नेसेटमा बहुमतका लागि ६१ सिट आवश्यक पर्नेमा नेतन्याहुविरोधी ‘चेन्ज ब्लक’ले ५८ सिट र नेतन्याहु समर्थक दलहरूले ५० सिट पाउने सर्वेक्षणको अनुमान छ। अरब दलहरूले १२ सिट पाउने प्रक्षेपण गरिएको छ।

सर्वेक्षणमा आइजेनकोटको पार्टी पछिल्ला साताहरूमा लगातार बलियो बन्दै गएको देखिएको छ। यसअघि लिकुडसँगको अन्तर निकै साँघुरो रहे पनि पछिल्लो परिणाममा यशारले चार सिटको स्पष्ट अग्रता बनाएको हो।

आगामी अक्टोबर २७ मा हुने निर्वाचनमा कुनै एक राजनीतिक खेमाले स्पष्ट बहुमत ल्याउने अवस्था हालका सर्वेक्षणले देखाएका छैनन्। त्यसैले चुनावपछि साना दलको समर्थन र गठबन्धन निर्माणले सरकार गठनमा निर्णायक भूमिका खेल्ने देखिएको छ।

यसैबीच विपक्षी खेमाभित्र पनि प्रधानमन्त्रीको उम्मेदवारलाई लिएर प्रतिस्पर्धा कायमै छ। आइजेनकोटलाई विपक्षी गठबन्धनको नेतृत्वमा अघि सार्नुपर्ने आवाज बढिरहेको छ। पछिल्लो समय केही सांसदसमेत आइजेनकोटको यशारतर्फ आकर्षित भइरहेका छन्।

लिकुड लामो समयदेखि इजरायली राजनीतिमा प्रमुख शक्तिका रूपमा रहँदै आए पनि पछिल्ला सर्वेक्षणमा उसको समर्थन कमजोर देखिएको छ। जुलाईको अर्को सर्वेक्षणमा पनि यशार २५ सिटसहित लिकुडभन्दा अगाडि देखिएको थियो।

पूर्वसेनाप्रमुख आइजेनकोटले २०२५ मा यशार पार्टी स्थापना गरेका हुन्। अहिले उनी नेतन्याहुको प्रमुख राजनीतिक प्रतिस्पर्धीका रूपमा स्थापित हुँदै गएका छन्।

तर सर्वेक्षणको अग्रता चुनावी परिणामको ग्यारेन्टी भने होइन। सरकार गठनका लागि आवश्यक ६१ सिट जुटाउन नसके इजरायलमा फेरि गठबन्धन र सत्ता समीकरणको जटिल खेल सुरु हुनसक्ने देखिएको छ।