काठमाडौँ । सङ्घीय संसद्, प्रतिनिधिसभाको बैठक आज दिउँसो १ बजे सिंहदरबारमा बस्दैछ। बैठकमा चार विधेयक प्रस्तुत हुनुका साथै केही महत्वपूर्ण विधेयक पारित गर्ने प्रस्तावसमेत पेस हुने कार्यसूची छ।

आजको बैठकमा परराष्ट्र मन्त्रालय तथा युवा, श्रम तथा रोजगार मन्त्रालयसँग सम्बन्धित मौखिक प्रश्नको सम्बन्धित मन्त्रीले जवाफ दिने सम्भावित कार्यसूची रहेको छ। बैठकमा अर्थमन्त्री डा. स्वर्णिम वाग्लेले ‘कर्मचारी सञ्चय कोष (दशौँ संशोधन) विधेयक, २०८३’ प्रस्तुत गर्नेछन्। कानुन, न्याय तथा संसदीय मामिलामन्त्री सोविता गौतमले ‘मेलमिलापसम्बन्धी (दोस्रो संशोधन) विधेयक, २०८३’ प्रस्तुत गर्ने कार्यक्रम छ।

युवा, श्रम तथा रोजगारमन्त्री रामजी यादवले ‘बालश्रम (निषेध तथा नियमित गर्ने) विधेयक, २०८३’ प्रस्तुत गर्नेछन्। त्यस्तै, प्रधानमन्त्री वालेन्द्र शाहको तर्फबाट मन्त्री गौतमले ‘संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी (पहिलो संशोधन) विधेयक, २०८३’ माथि विचार गरियोस् भन्ने प्रस्ताव पेस गर्नेछिन्। बैठकमा ‘नेपाल विशेष सेवा ऐन, २०४२ को साविकको व्यवस्था जगाउनेसम्बन्धी विधेयक, २०८३’ राज्य व्यवस्था तथा सुशासन समितिको प्रतिवेदनसहित पारित गरियोस् भन्ने प्रस्तावसमेत पेस हुने कार्यसूची छ।

यसैबीच, आजै चारवटा संसदीय समितिका बैठक पनि बस्दैछन्। पूर्वाधार विकास समितिमा राष्ट्रिय गौरवका आयोजना अध्ययन उपसमितिको प्रतिवेदनमाथि छलफल हुनेछ भने शिक्षा, स्वास्थ्य तथा सूचना प्रविधि समितिमा राष्ट्रिय विधि विज्ञान प्रयोगशाला विधेयक, २०८१ माथि छलफल हुनेछ। विकास, आर्थिक मामिला तथा सुशासन समितिमा राष्ट्रिय सदाचार नीति, २०८३ कार्यान्वयनबारे छलफल हुने र सङ्घीयता सबलीकरण तथा राष्ट्रिय सरोकार समितिमा बैठक सञ्चालन कार्यविधिमाथि छलफल हुने कार्यक्रम छ।