सिन्धुली । नेवाः देय दबू कमलामाई नगर समिति, सिन्धुलीको दोस्रो नगर अधिवेशनले मिनबहादुर श्रेष्ठको अध्यक्षतामा २१ सदस्यीय नगर समिति सर्वसम्मत रूपमा चयन गरेको छ ।
अधिवेशनबाट वरिष्ठ उपाध्यक्षमा शर्मिला श्रेष्ठ, उपाध्यक्षद्वयमा तारादेवी श्रेष्ठ र शम्भुबहादुर श्रेष्ठ, सचिवद्वयमा रमेश कुमार श्रेष्ठ र नानिमैया श्रेष्ठ तथा कोषाध्यक्षमा ज्योति श्रेष्ठ निर्वाचित भएका छन् । अन्य सदस्यहरू पनि सर्वसम्मत रूपमा चयन गरिएको आयोजकले जनाएको छ ।
नवनिर्वाचित अध्यक्ष मिनबहादुर श्रेष्ठले नेवार समुदायको भाषा, कला, संस्कृति, परम्परा र मौलिक पहिचानको संरक्षण तथा प्रवद्र्धनलाई प्राथमिकतामा राखेर काम गर्ने प्रतिबद्धता व्यक्त गरे । उनले समुदायबीच आपसी एकता, सहकार्य र युवापुस्तालाई सांस्कृतिक गतिविधिसँग जोड्ने कार्यक्रमलाई प्रभावकारी रूपमा अगाडि बढाइने बताए ।
अधिवेशनमा सहभागी वक्ताहरूले नेवार समुदायको साझा सम्पत्ति, सांस्कृतिक धरोहर र संस्थागत अधिकारको संरक्षणका लागि सबै पक्षबीच आपसी संवाद र सहकार्य आवश्यक रहेको धारणा राखेको रेजिना श्रेष्ठले जानकारी दिइन् ।
नवनिर्वाचित समितिले आगामी कार्यकालमा भाषा तथा संस्कृति संरक्षण, युवापुस्तालाई नेवारी संस्कृतिप्रति आकर्षित गर्ने बताएको छ । नेवाः देय दबू नेवार समुदायको भाषा, संस्कृति, परम्परा तथा सामाजिक एकताको संरक्षण र प्रवद्र्धनका लागि क्रियाशील संस्थाका रूपमा परिचित छ ।