काठमाडौं । प्रवासी नेपाली मञ्च (ओएनएफ) पोल्यान्डको पाँचौँ राष्ट्रिय अधिवेशनबाट अक्षय रिजाल अध्यक्षमा सर्वसम्मत निर्वाचित भएका छन्। प्रवासी नेपाली मञ्च अन्तर्राष्ट्रिय कमिटीका सदस्य सन्तोष भट्टराईको प्रमुख आतिथ्यतामा सम्पन्न अधिवेशनले रिजालको नेतृत्वमा नयाँ कार्यसमिति चयन गरेको हो।

नवनिर्वाचित कार्यसमितिको उपाध्यक्षमा रामप्रसाद सुवेदी, सचिवमा सुवास खतिवडा तथा सहसचिवमा निराजन आचार्य र अन्जु लामा निर्वाचित भएका छन्। त्यसैगरी, कार्यसमिति सदस्यमा विशाल कार्की, प्रदीप पुलामी मगर, सविना धटानी, सागर देवकोटा, श्याम गुरुङ र प्रज्वल सुवेदी चयन भएका छन्। बाँकी पदाधिकारी तथा सदस्यहरू आवश्यकताअनुसार पछि मनोनयन गरिने जनाइएको छ।

यस अवसरमा प्रवासी नेपाली मञ्च अन्तर्राष्ट्रिय कमिटीका सचिव चानक पोखरेलले नवनिर्वाचित अध्यक्षसहित सम्पूर्ण पदाधिकारी तथा सदस्यहरूलाई बधाई तथा सफल कार्यकालको शुभकामना व्यक्त गरेका छन्। पोखरेलले नयाँ नेतृत्वको कार्यकालमा प्रवासी नेपाली मञ्च पोल्यान्ड अझ सुदृढ, सक्रिय र प्रभावकारी संगठनका रूपमा स्थापित हुने विश्वास व्यक्त गर्दै पोल्यान्डमा रहेका नेपालीहरूको हक–हितको संरक्षण, आपसी एकताको प्रवर्द्धन तथा नेपाली भाषा, कला, संस्कृति र राष्ट्रिय स्वाभिमानको संरक्षण एवं प्रवर्द्धनमा संगठनले उल्लेखनीय भूमिका निर्वाह गर्ने अपेक्षा व्यक्त गरेका छन्।

अन्तर्राष्ट्रिय कमिटीले नयाँ कार्यसमितिको नेतृत्वमा पोल्यान्डस्थित संगठन अझ प्रभावकारी ढंगले अघि बढ्दै प्रवासी नेपाली समुदायबीच एकता, सहकार्य र सामाजिक उत्तरदायित्वका कार्यक्रमलाई थप सशक्त बनाउने विश्वाससमेत व्यक्त गरेको छ।