काठमाडौं। नेपाली कांग्रेसका प्रमुख सचेतक निश्कल राईले सरकारले काठमाडौं महानगरपालिकाका प्रमुख बालेन शाहलाई आलोचना र प्रश्नभन्दा माथि राख्न खोजेको आरोप लगाएका छन्। उनले बहुमतको आडमा संविधान र कानुनलाई कमजोर पार्ने प्रयास भइरहेको भन्दै सरकारमाथि तीखा प्रश्न उठाए।

प्रतिनिधिसभाको बैठकमा बोल्दै राईले १८२ सिटको बहुमतले संविधान मिच्ने अधिकार नदिने स्पष्ट पार्दै भने, ‘बहुमतले संविधान उल्लङ्घन गर्ने लाइसेन्स दिँदैन। संविधान सर्वोच्च हो, बहुमत होइन।’

उनले सरकारले नागरिकले उठाएका वैधानिक प्रश्नलाई दबाउन खोजेको आरोप लगाउँदै भने, ‘आज देशमा यस्तो भाष्य निर्माण गरिँदै छ कि श्री ८ बालेन शाहलाई प्रश्न गर्न पाइँदैन। संविधान र कानुनको सीमाभित्र उठेका प्रश्नभन्दा माथि कोही पनि हुन सक्दैन।’

राईले सरकारको रवैयाले लोकतान्त्रिक मूल्य र अभिव्यक्ति स्वतन्त्रतामाथि नै प्रहार गरेको दाबी गरे। उनका अनुसार जनताले दिएको बहुमत शासन सञ्चालनका लागि हो, नागरिकको मुख थुन्न वा प्रश्न गर्ने अधिकार खोस्नका लागि होइन।

उनले विगतमा अभिव्यक्ति स्वतन्त्रताको पक्षमा उभिएका नेताहरू अहिले आलोचना सहन नसक्ने अवस्थामा पुगेको टिप्पणी गर्दै प्रश्न गरे, ‘हिजो “मलाई बोल्न दे सरकार” भन्नेहरू आज किन प्रश्न सुन्न डराइरहेका छन् ?’ राईले संविधान, कानुनी शासन र लोकतान्त्रिक मूल्यभन्दा माथि कुनै व्यक्ति वा पद हुन नसक्ने भन्दै सरकारलाई बहुमतको दम्भ त्याग्न आग्रह गरे।