काठमाडौं । मकवानपुरको हेटौंडा उपमहानगरपालिका–१७ स्थित कर्रा खोलामा आएको बाढीले सोमबार बिहान एउटा १२ चक्के ट्रक बगाएको छ। ट्रक चालक भने पौडिएर सुरक्षित बाहिर निस्कन सफल भएका छन्।

प्रहरीका अनुसार शिवम् सिमेन्ट उद्योगबाट चुनढुंगा अनलोड गरेर फर्किरहेको ना ७ ख ७६५ नम्बरको ट्रक बिहान करिब ७:४५ बजे खोला तर्ने क्रममा बाढीमा परेको हो।

जिल्ला प्रहरी कार्यालय मकवानपुरका प्रहरी नायव उपरीक्षक माधवप्रसाद काफ्लेका अनुसार खोला पार गर्न ह्युमपाइप राखेर बनाइएको कल्भर्टमाथि पानीको बहाव एक्कासि बढेपछि ट्रक बगाएको हो।

ट्रक चालक चितवनको रत्ननगर नगरपालिका–१३ निवासी ३४ वर्षीय दीपक थिङले पौडिएर ज्यान जोगाएका छन्। घटनामा उनको खुट्टामा सामान्य चोट लागेको छ। हाल हेटौंडा–६ चौघडास्थित एक मेडिकलमा उनको उपचार भइरहेको प्रहरीले जनाएको छ।

बाढीले बगाएको ट्रकलाई खोलाबाट निकाल्ने प्रयास भइरहेको प्रहरीले जनाएको छ। लगातारको वर्षाका कारण नदी तथा खोलामा पानीको सतह बढिरहेकाले जोखिमयुक्त स्थानबाट आवतजावत नगर्न प्रशासनले सर्वसाधारणलाई आग्रह गरेको छ।