काठमाडौं। काठमाडौं महानगरपालिका–१० बुद्धनगरमा शनिबार बिहान आत्मदाहको प्रयास गरेका ४५ वर्षीय आश्विन राउतको उपचारका क्रममा निधन भएको छ।

जिल्ला प्रहरी परिसर काठमाडौंका प्रवक्ता एसपी पवन भट्टराईका अनुसार आफ्नै घरको भान्सा कोठामा शरीरमा आगो लगाएका राउतलाई तत्काल प्रहरीले उद्धार गरी वीर अस्पताल पुर्‍याएको थियो। उनको सघन उपचार कक्ष (आईसीयू) मा उपचार भइरहेको थियो।

प्रहरीका अनुसार राउतको शरीर ५० प्रतिशतभन्दा बढी जलेको थियो। उपचारकै क्रममा शनिबार उनको मृत्यु भएको एसपी भट्टराईले पुष्टि गरे।

राउत श्रीमती र एक छोरासहित बुद्धनगरमा बस्दै आएका थिए। उनले किन यस्तो चरम कदम चाले भन्ने विषयमा हालसम्म कुनै स्पष्ट कारण खुलेको छैन।

घटनाबारे प्रहरीले आवश्यक अनुसन्धान अघि बढाएको जनाएको छ।