काठमाडौं । अविरल वर्षापछि आएको बाढीले कीर्तिपुरस्थित होल्डिङ सेन्टर डुबानमा परेपछि त्यहाँ आश्रय लिइरहेका सुकुम्बासी परिवारहरू पुनः विस्थापित भएका छन्। सुरक्षा अवस्थालाई मध्यनजर गर्दै होल्डिङ सेन्टर क्षेत्रमा नेपाल प्रहरी र सशस्त्र प्रहरी बलको बाक्लो सुरक्षा परिचालन गरिएको छ।

गएराति करिब १ बजेदेखि बाढीको पानी होल्डिङ सेन्टरभित्र पस्न थालेपछि प्रभावित परिवारहरूले हतारहतार आफ्ना सामान सुरक्षित स्थानतर्फ सारेका थिए।

विस्थापितहरूलाई दीर्घकालीन व्यवस्थापनका लागि भक्तपुरको खरिपाटीमा स्थानान्तरण गर्ने विषयमा छलफल भइरहेको भए पनि त्यसबारे अन्तिम निर्णय हुन बाँकी रहेको जनाइएको छ। हालका लागि उनीहरूलाई होल्डिङ सेन्टर नजिकै रहेको कीर्तिपुरको स्मृति भवनमा अस्थायी रूपमा आश्रय दिइएको छ। बाढीको जोखिम कायम रहेकाले सुरक्षा निकायले क्षेत्रको निगरानी बढाएको छ।