काठमाडौं । दाङको घोराही उपमहानगरपालिकाका शिक्षा अधिकृत अजय बोहोरामाथि वडा सदस्यले सार्वजनिक रूपमा मोबिल खन्याएर दुर्व्यवहार गरेका छन्। घटनाको भिडियो सामाजिक सञ्जालमा सार्वजनिक भएपछि व्यापक आलोचना भइरहेको छ।

घोराही–१५ का वडा सदस्य लेखनाथ बुढाथोकी (उत्तम)ले पद्मोदय पब्लिक स्कुलको विद्यालय व्यवस्थापन समिति (एसएमसी) निर्वाचन प्रक्रिया नियमविपरीत भएको आरोप लगाउँदै बोहोरामाथि मोबिल खन्याएका हुन्।

भाइरल भिडियोमा मोटरसाइकलमा सवार बोहोरालाई बाटोमै रोकेर हेलमेटमाथिबाट मोबिल खन्याइएको देखिन्छ। उक्त भिडियो बुढाथोकी आफैंले सामाजिक सञ्जालमा पोस्ट गरेका थिए।

घटनापछि शिक्षा क्षेत्रका कर्मचारीहरूले सार्वजनिक सेवामा खटिएका कर्मचारीमाथिको यस्तो व्यवहार अस्वीकार्य भएको बताएका छन्। सामान्य प्रशासनिक असहमतिलाई हिंसात्मक र अपमानजनक शैलीमा प्रस्तुत गर्नु कानुनी शासनमाथिको चुनौती भएको टिप्पणीसमेत हुन थालेको छ।

जिल्ला प्रहरी कार्यालय दाङले घटनाबारे अनुसन्धान सुरु गरेको जनाएको छ। तर समाचार तयार पार्दासम्म आरोपित वडा सदस्य लेखनाथ बुढाथोकी पक्राउ परेका छैनन्।