काठमाडौं । मुगुका २५ वर्षीय गणेश नेपालीको आत्मदाहपछि उपचारका क्रममा मृत्यु भएको घटनाको झट्का नसेलाउँदै सर्लाहीमा पनि उस्तै प्रकृतिको अर्को घटना भएको छ।

सर्लाहीको गोडैता नगरपालिका–१० निवासी ३५ वर्षीय विवेक मण्डलले शुक्रबार आफ्नै शरीरमा पेट्रोल खन्याएर आगो लगाई आत्मदाहको प्रयास गरेका हुन्।

घटनामा उनी गम्भीर रूपमा घाइते भएका छन्। उनको अवस्था अत्यन्तै नाजुक रहेको सर्लाहीका सहायक प्रमुख जिल्ला अधिकारी होमप्रसाद घिमिरेले जानकारी दिएका छन्।

घिमिरेका अनुसार मण्डललाई थप उपचारका लागि हेलिकोप्टरमार्फत काठमाडौं ल्याउने तयारी भइरहेको छ। “हेलीबाट उद्धारको तयारी भइरहेको छ। अवस्था चिन्ताजनक छ,” उनले बताए।

मुगुका गणेश नेपालीको मृत्युले देशभर आक्रोश र बहस चर्किरहेका बेला दुई दिनमै अर्को आत्मदाह प्रयासको घटना सार्वजनिक भएपछि मानसिक स्वास्थ्य, सामाजिक निराशा र संकटमा परेका व्यक्तिहरूलाई समयमै सहयोग पुर्‍याउने विषय फेरि गम्भीर रूपमा उठेको छ। प्रहरीले घटनाको कारणबारे अनुसन्धान गरिरहेको छ।